Монголын дугуйн холбоо (МДХ) нь тамирчдыг аль нэг клубээр дамжуулан бүртгэж, тухайн жилийн тэмцээнүүдэд оролцох лиценз олгодог ба Улаанбаатар уулын дугуйн клубийн гишүүд клубийн нэрээр МДХ-нд бүртгүүлэн лиценз авч болно.
Лицензийн мэдүүлгийг тодорхой хугацаанд хүлээн авах бөгөөд үүний товыг одоогоор зарлаагүй байна.
МДХ-ны лиценз авах тамирчин нь МДХ-ноос тавьдаг нөхцөл шаардлагын дагуу унадаг дугуйн аль нэг клубтэй гэрээ байгуулсан байх ёстой бөгөөд Улаанбаатар уулын дугуйн клуб нь дараах нөхцөл бүхий гэрээг цахимаар байгуулна.
Улаанбаатар уулын дугуйн клубээс тамирчинтай байгуулах гэрээ
- Гэрээ нь Монголын дугуйн холбоо(МДХ)-ны тамирчны лиценз, клубийн татвар, унадаг дугуйн тэмцээн уралдаантай холбогдон үүсэх Улаанбаатар уулын дугуйн клуб (цаашид товчоор клуб гэнэ) ба тамирчин хоорондын харилцааг зохицуулна.
- Гэрээ нь тухайн оныг дуустал үйлчилнэ.
- Улаанбаатар уулын дугуйн клубийн нэрээр МДХ-ны лиценз авах тамирчин нь тус клубийн гишүүн байна.
- Клубийн гишүүн нь лицензийг сайн дурын үндсэн дээр авна.
- Клубийн гишүүн нь МДХ-ноос шаардсан мэдээллийг хувийн мэдээлэл хуудсаар дамжуулан хамгийн сүүлийн үеийн байдлаар бүрэн бөгөөд үнэн зөв өгсөн байна.
- Клубт харьяалагдах лицензтэй гишүүн нь МДХ-ноос зохиох унадаг дугуйн тэмцээн уралдаанд Улаанбаатар уулын дугуйн клубийн нэрээр оролцоно.
- Клубийн гишүүн нь лицензийн төлбөрөө өөрөө хариуцна.
- Лиценз авах гишүүн нь МДХ-ны дүрэмд заасан клубийн татварыг мөн лиценз авах бусад гишүүдтэй хамт төлөлцөнө.
- Клубийн гишүүн нь лиценз авалгүйгээр зөвхөн МДХ-ноос ногдуулсан клубийн татварыг төлөлцөж болно.
- Клубийн гишүүн нь лицензийн төлбөр болон МДХ-нд тушаах клубийн татварын өөрт ногдох хэсгийг товлосон өдрөөс өмнө төлнө.
- МДХ-ны тамирчны лицензийн төлбөр болон МДХ-нд тушаах клубийн татвар хураах, МДХ-нд тушаах ажлыг клубийн админ удирдан зохион байгуулна.
- Клубийн гишүүн нь лиценз авах мэдүүлгээ лицензийн төлбөрөө тушаахаас өмнө бас тушаасан нь клубийн веб дээр баталгаажихаас өмнө цуцалж болно. Төлбөр нь баталгаажсан лицензийн мэдүүлгийг үл цуцална. Мөн хураан цуглуулсан татварыг үл буцаана.
- Клубт харьяалагдах лицензтэй гишүүн нь унадаг дугуйн тэмцээн, уралдаанд сайн дурын үндсэн дээр оролцох бөгөөд үүнтэй холбогдон гарах аливаа зардлаа өөрөө хариуцна.
- Клубт харьяалагдах лицензтэй гишүүн нь унадаг дугуйн тэмцээн, уралдаанд оролцох үедээ өөрийн эд хөрөнгө, эрүүл мэнд, амь насыг бүрэн хариуцна.
- Клубт харьяалагдах лицензтэй гишүүн нь унадаг дугуйн тэмцээн, уралдаанд оролцохдоо бусдын эрүүл мэнд, амь нас, эд хөрөнгөд учруулсан хохирлоо бүрэн хариуцна.
- Лиценз авахаа мэдүүлэхийг энэхүү гэрээг хүлээн зөвшөөрч, даган мөрдөх баталгаа өгсөнд тооцно.
