Улаанбаатар уулын дугуйн клубийн аяллын маршрут

Багануур хотоос гарч маршрутын дагуу 80 км явж Хар зүрхний Хөх нуур хүрнэ. Уг замын хагас засмал зам байна. Нуурт хүрэх үед даваа давахын чинээ өгсөнө.

Хар зүрхний Хөх нуураас 55 орчим км явж Балдан бэрээвэн хийд хүрнэ. Замдаа хоёр даваа давна. Эхний даваа давуут буюу 40 км явахад Хангал нуур зам дагуу таарна.

Хийдээс цааш 75 орчим км зам туулж Рашаан хад хүрнэ. Хийд орчимд даваа давсаны дараа алсын уруу, Биндэр сумыг чиглэсэн замаар явна.

Рашаан хаднаас арваад км явж Өглөгчийн хэрэм хүрнэ. Жич: Маршрутын энэ хэсгийг интернэтээр хайхад олдсон цахим эх сурвалжид үндэслэн зохиосон. Улмаар буцаж Биндэр сум хүрэх замд эргэн орно. Залгуулан 40 шахуу км явж Биндэр сум орно. Уулын хөндийгөөр гол дагах боловч гол ба уулын шахаа тойрсон замаар хоёр удаа даваа давна.

Биндэр сумын төвөөс арваад км явж Яргуй хавцал, Нарсан ойн хүрээлэн хүрнэ. Даваа давахын чинээ өгсөнө. Явсан замаараа буцаж сумын төвд эргэн очно. Улмаар Биндэр сумын төвөөс 40 орчим км явж Баян-Адарга сумын төв улмаар Дуурлиг нарсны Хүннүгийн булш хүрнэ. Сумын төв хоорондын замын гуравны нэг орчимд харьцангуй их өгсөлт ба уруудалттай даваа давна.

Баян-Адарга сумаас 75 орчим км, алсын өгсүүр замаар явж Гурванбаян тосгон хүрнэ. Зам зуурт даваа давна.

Гурванбаян тосгоноос даваа бүхий 50 км замаар явж Өмнөдэлгэр сумын төв хүрнэ.

Жич: Өмнөдэлгэр сумын төвөөс шинээр баригдаж буй (эсвэл баригдсан байх) засмал замаар явж Өндөрхаан - Багануур чиглэлийн төв замд Мөрөн ба Жаргалтхаан сумын төвүүдийн дунд байх (47.456991, 109.675671) орчим солбицолтой цэгт нийлж болно. Ингэсэн тохиолдолд замын урт маршрут дээрх 160 км-ээс ихэснэ.

Жаргалтхаан сумаар дайран Багануур хүрнэ. Жаргалтхаан сумыг өнгөрсөний дараа зам зуурт, Цэнхэрмандал сумын харалдаа байх гуанз, дэлгүүр орж болно. Үүний дараа Багануураас 50 км зайд даваа давж улмаар Хэрлэн голыг төмөр бетон гүүрээр гараад Багануур хүрнэ.