Өдрийн аялал #45 - БАТСҮМБЭР СУМЫН НУТГААР БУЮУ НАМРЫН ЦАС

Мэдрэмж, хандлага

Надад өөр мэдрэмж, хандлага төрүүлж болно.

Сорилт

Намайг бие болон сэтгэлийн сорилт хүлээнэ.

Тэсвэр, тэвчээр

Би замд дураараа амрахгүй, зогсохгүй.

Эрсдэл

Надад ямар ч эрсдэл учирч болно.

Хувийн шийдвэр

Оролцох шийдвэрийг би өөрөө л гаргасан.

Хариуцлага

Би өөрийгөө хамгаалж, хооллож, тээвэрлэнэ.

Байдаг л үйл

Нэр хүнд олох, бусадтай өрсөлдөх талбар биш.

Жийлтийн эрчим

Бусдын сайн, муу жийх нь надад хүртээлгүй.

Тэгш байдал

Нас, ажил мэргэжил, алдар цуу хамаагүй.

Хамжаарга

Өөрийнхөө тухай ярих нь сонин бус.

Хувийн нууц

Бусдын тухай мэдэх шаардлагагүй.

Дэг журам

Клубийн дүрмийг ёсчлон дагана.

Аяллын тэмдэглэл

Бүрхэг тэнгэрийн борооны үүлс усаар уйлагнан биднийг хотоос үдлээ.

Манай аяллын баг 15 аялагч, 15 унадаг дугуй, 4 автомашинтай байлаа. Батсүмбэр сумын хуучин бууринд орших 2-р багийн бага шиг сууринд ирж сайхан сэтгэлт нутгийн айлын хашаанд автомашинаа орхиод 11.00 цагт аялал эхлэв.

Салхи сэр сэр салхилсан, зэврүүн өдөр боллоо. Харин бороо зогслоо. Автомашинаар 70 гаруй км зам туулсан тул унадаг дугуйгаа унахад бие баригдмал, хөшүүн байлаа. Эхний даваагаа сүн гээд л бүгд жийгээд давсан. Уруудан төмөр зам, Хараа голоо даган 20 гаруй км жийсний дараа бие тавирч эхлэв. Бороо орохгүй л байлаа.

Багийн гишүүдийн хөлийг норгохгүйн тулд Хараа голыг дүүжин гүүрээр гарч, Өлгий голын төмөр замын гүүр доогуур шурган дов сондуул, бага шиг торлог, хусан ой бүхий голын нугаар зурайх үхрийн жимээр 2 орчим км жийж, алхлаа. Өлгий голын хөндийд намаржих байгаль хамгаалагчтай уулзав.

Зураг 4. даваагаа даваад Хараа голын хөндий рүү уруудан орно

Өлийн даваа өөд өгсөх замаар цувран жийх үеэр цас орж эхлэв. Ширхэг том, чийг ихтэй юм билээ. Манай багийн ихэнх залуус даваа өөд зурайх ховил, шавартай замаар жийсээр байгаад гарсан даа. Шавар болсон дугуйнууд хүндэрч, хувцас нэвт жиндээх салхинд хөлстэй бие хайрагдана.

Гэвч манай багынхан хойно хоцрох нөхдөө хүлээн давааны оройн зулзаган модон дотор ярилцан, хөгжилдсөөр. Даваагаа уруудан Морин даваа (оройдоо 12 жилтэй)-г давж, бага шиг хөтөл дээгүүр тонгойж уруудан Чулуун хороо гэж нэрлэх бяцхан сууринд ирж хашааны нөмөрт салхинаас хорогдов.

Зураг 6. Өдрийн хоол. Төмөр замын 289-р точка (суудлын вагон зогсдоггүй)

Аялагч нарынхаа хөлийг нь норгохгүй гэж хичнээн мэрийсэн ч Хараа голын хамгийн сүүлийн өргөн салааг аргагүй л гатлах болсон доо. Хайртай ганц охиноо үүрч, гуталтайгаа туулах нь туулж, зарим нь хөл нүцгэн дугуйгаа үүрч, нэг нэгэндээ тусалж гаталсан.

Зураг 7. Өлийн даваа өгсөхүйд цас бударлаа

Нутгийн айлд 16.30 цагт ирж автомашиндаа хуваагдан сууж, дугуйнуудаа ачиж хотын зүг явж, аялал амжилттай дууслаа. Аяллын зай 47 км.

Намрын зэвэргэн, өвөл арай л эрт ирчихэв үү гэмээр өдөр жавхаатай аялан замаа дуусгасан дугуйчин анд нартаа талархал илэрхийлье. Мөн гэрэл зурагчин Ч.Мажигсүрэн (036), бүх "жолооч- дугуйчин" нартаа баярлалаа.