Өдрийн аялал #203 - Төрхурахын ам

Үүний өмнөх аяллын дараа цас орж огцом сэрүүссэн тул өнөөдрийн аяллыг ийнхүү харьцангуй ойр чиглэлээр зохиох болсон юм. Мөн өнөөдрийн аяллын давхар зорилго бол уулын цас хэр хайлсаныг шалгах байлаа.

Аялалд яг 09:00 цагт эхлэв. Аялалд оролцохоор бүртгүүлсэн гишүүд ч бүгд цагтаа ирсэн буюу хоцорсон хүн байсангүй. Дүнжингаравын унадаг дугуйн зам, Налайхын дугуйн замаар явж Туул зөрлөг орчмоос маршрутын үндсэн хэсэг болох шороон зам руу орлоо. Энэ хавьд шинэ зам тавих гэх мэтчилэн мэдэгдэхүйц өөрчлөлт оржээ. Ер нь сүүлийн үед жил ирэх бүр Улаанбаатар хотын эргэн тойрон улам хурдацтай өөрчлөгдөх болсон нь илт анзаарагдах болжээ. Энэ зарим талаараа сайн хэрэг байж болох ч өнөөдрийнх шиг УБ хотын эргэн тойрноор унадаг дугуйтай аялдаг "өдрийн аялал" маань хэтдээ яах бол гэсэн асуулт сэтгэл зовооно. Ямартаа ч боломж байгаа дээр жийж л байя даа.

Богд уулын арын шороон замыг хусаж тэгшлээд, хүнд даацын ачааны автомашинууд хөлхөх болжээ. Дархан цаазат уулын аль нэг аманд хотхон барьж буйн шинж биз. Эрт цагт Х.Пэрлээ гуай Богд уулын магтаалдаа "Ам болгон цагдаатай" гэж байсан бол өдгөө "Ам болгон хотхонтой" гэмээр болжээ.

Өнөөдөр хэдийгээр уулын даваа даваагүй ч энэ удаагийн аяллын маршрутын оргил цэг болох Төрхурахын амаар өгсөж ойн дундуурх явган алхалт жим эхэлдэг цэгт хүрээд буцахад хуримталсан өгсөлт ба буруудалт нь давааны чинээнд хүрдэг. Гэхдээ өгсүүр нь алгуурхан тул айвуу тайвуухан жийгээд гарчихдаг. Энэ удаад бид тун алгуурхан жийцгээсэн тул аяллын оргил цэгт 12:10 цагт хүрч очсон. Мөн тэндээ 13 цаг өнгөртөл тухтай амарч аваад хөдөлсөн. Хэдий саяын хэд хоногт овоо сэрүүн байсан ч ойн захад, уулын энгэрт маш сайхан дулаан, ёстой л налайж байлаа.

Энэ дашрамд нөгөөх зорилгоо биелүүлэн мод руу бас уулын горхи хавиар эргэлдэн сүүлд орсон цасны үлдэц ямар байгааг сонжлоо. Цас бараг хайлж зөвхөн чийгтэй, хамгийн сэрүүн баймаар хэсгүүдэд л мэр сэр цас үлджээ. Иймээс хэрэв ирэх бямба гараг хүртэл цасгүй байвал ой модтой уулын даваа давж аялахаар шийдлээ.

Буцах замд биднийг клубийн админ Э.Отгонжаргал ах маань тосон хүлээж байжээ. Ингээд Төрхурахын амны рашаан булгийн орчмоос цааш зургуулаа болоод аяллын тарах цэг болох Дүнжингарав хүртэл жийцгээлээ.

Буцах замд салхи сөрсөн ч төдий хүчтэй биш байсан уу, багийн гишүүд эрч хүчтэй байсан уу, бараг бүгдээрээ давгүй өндөр эрчимтэй жийсээр Дүнжингарав худалдааны төвийн гадаа ирсэнээр өнөөдрийн аялал амжилттай өндөрлөлөө.

Аялалд оролцож, төлөвлөсөн маршрутыг амжилттай туулсан багийн гишүүддээ баяр хүргэе.

Зүгээр л жий.