Улаанбаатар уулын дугуйн клубийн аялал

Маршрутын талаарх нэмэлт мэдээлэл

Аялалд оролцохоор бүртгүүлсэн гишүүд цуглах цэгээс хойш Тахилтын амаар өгсөн Тахилтын даваа давж Тахилтын хөндий улмаар залгуулан Шижирийн хөндийгөөр уруудаж Хүйн голын хөндий рүү орох буюу Ар шижир дэх сууринд хүрнэ. Суурин руу оролгүй Шижрийн уулын бэл даган араар нь тойрно. Цааш Хүйн голын хөндийгээр чигээрээ жийсээр Бурхантын уулны хойд хошууг тойрч Толгойтын ам руу буюу Ар гүнт рүү орно. Эндээс цааш Толгойтын ам руу бус харин Бурхантын уул ба Цагаан бургас уул хоорондын ам руу орж улмаар Цагаан бургас уулын хамар дээгүүр давах буюу буцаад Толгойтын ам руу орно. Үүнээс цааш цардмал автозам руу орж жийн Гүнтийн давааг давж Жигжид хүрсэнээр аялал өндөрлөнө.

Аяллын тэмдэглэл

Аяллын баг цуглах цэг буюу Тахилтын автобусны эцсийн буудлаас 09:01 цагт хөдлөв. Аялал эхлэх цагтай уралдан 09:00 цагт нэг гишүүн ирэв. Мөн араас хоёр гурван гишүүн нэхэн иржээ. Ийнхүү аялалд оролцохоор бүртгүүлсэн 33 гишүүний 29 нь хүрэлцэн иржээ. Харин ирээгүй гишүүдийн нэгний унадаг дугуйд техникийн асуудал гарсан гэсэн мэдээг хожим авлаа.

Хаврын сэрүүн өглөө, давааны алсуур өгсүүр, чанх өөдөөс үлээх салхи. Тахилтын хэмээх уртаас урт уг амны алсуур өгсүүр өөд зүтгэхэд зарцуулах нэмэлт ачааллаас халсан биеэ энэхүү сэрүүн салхиар сэрүүцүүлэн жийх туйлын таатай. Манай нэг гишүүний хэлдэгчлэн жаргах жийх гэдэг ёстой л энэ гэлтэй.

Тахилтын даваа нь нүцгэн буюу модгүй даваа тул давааны өвөр ба ар талд цас төдийлэн хуримтлагдаагүйн дээр нар салхинд аль хэдийн хайлж ууршин алга болжээ. Харин жалга судгаар нь мэр сэр цас байсны бараг бүгдийг нь аргалаад жийн гарч болж байна. Хайлаагүй үлдсэн бусад цас нь 6 хоногийн өмнө орсон сүүлийн цас л болов уу. Ерөнхийдөө энэ удаагийн аяллын маршрутын дагуух зам яг төсөөлж байснаар шууд хальтираад бүр яагаад ч тогтож болдоггүй улгүй шавар нь багасаж, дугуй зоогдоод явах ямар ч аргагүй болгодог цас нь яг алга болсон буюу ид жийдэг дээрээ байлаа.

Тахилтын давааны алсуур өгсүүрт манай багийнхан ихэд цуварчээ. Даваанаас баруун тийш уул хярлан жийж өндөрт гараад харахад цувааны сүүл нэлээн хол харагдана. Уулын бэл рүү алгуур уруудаж болох бяцхан хошуу даган дугуйгаа аажуу өнхрүүлсээр бууж очтол УШТГ Ган-Очир хоёр гартаа нэжгээд дугуй түрэн алхана. Бие нь түр тавгүйтсэн нэгэн ахдаа туслан, давааны өгсүүрийн сүүлийн огцом хэсгийг давуулж өгөхөөр яваа нь тэр ажээ.

Тахилтын даваа дээр цувааны сүүлийн гишүүдээ ирэхийг хүлээж бас хэсэг амсхийн амарч уруудахад бэлдэв. Үүний зэрэгцээ клубийн гишүүний бахархлын тэмдгийн болзол биелүүлсэн хоёр гишүүндээ тэмдгийг нь ёслол хүндлэлтэйгээр гардуулж өгөв.

Ингээд 10:15 цагт Тахилтын даваанаас уруудаж эхэллээ. Тахилтын давааны арын урууд гуч дөчин км/ц-ийн хурдаар хийсэх мэт урууддаг даа. Гэтэл энэ удаад жийгээд жийгээд хурд дөнгөж хорин хэдэн км/ц-т л хүрч байна. Хаврын салхины хүчээ гэж.

Давааны уруу жийж жийсээр амны адагт хүрэхэд манайхан татчихаж. Амны адагт байдаг суурингийн хамгийн эхний хашааг салхины нөмөр болгон татаж зогссон нь маш зөв шийдвэр юм. Энэ бол хашир туршлагатай чиглүүлэгч маань энэ удаагийн аялалд яваагийн давуу тал л даа. Баг яг нэг баг болж аялахад цувааны толгойд явах хүн буюу чиглүүлэгч гол үүрэг гүйцэтгэдэг. Замын салаа, эргэлтийн цэг, маршрутын уртаас болж тасарч цувсан аяллын багийн гишүүдэд эргэлзээтэй болох хэсэг зэргийг алдалгүй мэдэрч багийг татах нь чиглүүлэгчийн л сайных юм.

Өнөөдрийн аяллын маршрутын өндөршлийн зураг дээр хоёр том давааны дунд харагдах жижигхэн шовгор бол өнөөдрийн аяллын чимэг юм. Цагаан бургас уул хэмээх намхан уулын хамраар давах замын өгсүүр уруу нь манай багийнхныг тэрүүхэн тэндээ доруйхан сорьж чадсан. Хамар дээр түрүүлж гарсан нь араас гарч ирэх нэгнээ дэмжинэ, зөвлөнө, хүч алдаж эсвэл хальтирч буух бүр унахад нь гэм хоргүйгээр инээлдэн хөгжилдөцгөөнө. Эдгээрээс хамгийн оргил нь гэвэл өгсүүр өөд зүтгүүлэх унадаг дугуйных нь араа шүд яалт ч үгүй дутан явахаа болиход нь шифи-гээ мултлан бууж амжилгүй унасан нэг залуу гишүүнийг "За одоо наашаа харчих" хэмээн байж нүүр царайг нь видео бичлэгтээ оруулсан нэг эгчийн үйлдлийг хэлж болох юм. Камер өөдөө харан инээмсэглэх залуу хүүгийн инээмсэглэлд ичих байдал огт үгүй. Хурд гаргахад зориулан тоноглосон жижиг араатай дугуйг явахаа больтол нь зүтгүүлж тэр өндөр гаргаж чадсан түүнд ичих зүйл юу байх сан билээ.

Уг бяцхан боловч хэрдээ таарсан өгсүүр хамарыг жийж давахаар зориглоогүй гишүүд харин өгсүүр өөд шунан жийсэн мань мэтийнхээ анзааралгүй өнгөрүүлсэн хаврын яргуйг олж үзсэнээ гар утасны камераар фото зураг болгон буулгацгаажээ. Ердөө УБ хотын хилийн дээс давалгүй ойрхон аялахад л ийм гоё зүйл үзэж болдог ажээ.

Цагаан бургас уулын хамар даван уруудаж эхлэхэд 11:50 цаг болж байв. Уг уулын ташлан нь овоо огцом аж. Огцом уруу байгааг нэг нэгдээ анхааруулж улмаар өөр өөрсдийн ур чадвар, унадаг дугуйн онцлогтоо тохируулан осолгүй бууцгаалаа.

Замын сүүлийн эргэлтийн цэг болох Ар гүнтийн цардмал замтай нийлэх шороон замын уулзварт ирэхэд цаг 12:15 болж байв. Замын уулзварын ар байх жижиг дэлгүүрийн урд талбай дээр багаараа хамт сууцгаан үдийн хоолоо идэж 12:40 цаг хүртэл амрав.

Ийнхүү хориод минут амраад сүүлийн даваа болох Гүнтийн даваа руу дайрлаа. Гүнтийн даваа өнөөх л байдаг янзаараа буюу замын шороо хаашаа хийсэх нь ойлгомжгүйгээрээ. Ингээд 20 дугуйтай машинаас үл дутахаар шороо босгох суудлын машинуудын дундуур шувт гарч Өвөр гүнтийн эвдэрхий, нойтон, шалбаагтай замаар уруудсаар өнөөдрийн аяллын тарах цэг болох Жигжидийн уулзвар дээр ирцгээлээ. Эхний гишүүд яагаа ч үгүй эрт тэнд очицгоосон бол харин хамгийн сүүлийн хүн 14:00 цаг гэхэд ирсэнээр өнөөдрийн аялал амжилттай болж өндөрлөлөө.

Дараагийн аяллаар эргэн уулзаж хамтдаа ЗҮГЭЭР Л ЖИЙцгээе.

Оролцсон гишүүд

• бахархлын тэмдэг
• туулсан замын урт
• оролцсон аяллын тоо
• оролцсон хоногийн аяллын тоо
• оролцсон олон хоногийн аяллын тоо
• УБ 240/24 аяллыг амжилттай дуусгасан тоо
• Долоон давааны сорилго давсан тоо

Э.Энххуяг

• 1179 км дутуу
• 80 км
• 1
• 0
• 0
• 0
• 0

Э.Уранзул

• 646 км дутуу
• 613 км
• 8
• 0
• 0
• 0
• 0

С.Бөхбат

• 466 км дутуу
• 793 км
• 9
• 0
• 0
• 0
• 0

Э.Сарангарав

• 405 км дутуу
• 854 км
• 8
• 0
• 0
• 1
• 0

Б.Батбуян

• 1414 км
• 15
• 0
• 0
• 0
• 1

О.Шинэбаяр

• 1478 км
• 14
• 0
• 0
• 0
• 1

Д.Бямбасүрэн

• 1978 км
• 20
• 0
• 0
• 1
• 1

Д.Ганболд

• 1982 км
• 25
• 1
• 0
• 0
• 0

С.Отгонбаатар

• 2294 км
• 25
• 0
• 0
• 1
• 1

У.Хосбаяр

• 2690 км
• 27
• 0
• 0
• 0
• 1

А.Отгонбаяр

• 3044 км
• 26
• 0
• 0
• 1
• 1

Н.Даваасүрэн

• 3350 км
• 29
• 0
• 0
• 2
• 2

Б.Элбэгзаяа

• 3776 км
• 33
• 0
• 0
• 2
• 1

Б.Сүхбат

• 4942 км
• 48
• 6
• 0
• 1
• 0

Д.Сонинбаяр

• 5168 км
• 47
• 7
• 2
• 1
• 2

Г.Ёндонжамц

• 5575 км
• 48
• 5
• 1
• 1
• 0

Т.Ган-Очир

• 6865 км
• 71
• 6
• 0
• 2
• 2

Т.Баярсайхан

• 8267 км
• 92
• 2
• 0
• 3
• 0

П.Батмөнх

• 8270 км
• 85
• 6
• 1
• 0
• 2

Б.Бадрах

• 8852 км
• 88
• 2
• 0
• 3
• 1

Б.Баттөмөр

• 9457 км
• 97
• 8
• 0
• 3
• 4

Д.Баасансүрэн

• 9615 км
• 65
• 4
• 2
• 2
• 0

Б.Жавхлантөгс

• 10366 км
• 99
• 10
• 1
• 2
• 3

Ж.Октябрь

• 10738 км
• 120
• 0
• 0
• 0
• 0

С.Мөнхбат

• 10811 км
• 93
• 12
• 3
• 3
• 1

Г.Махгал

• 11142 км
• 111
• 7
• 1
• 2
• 4

Н.Төгөлдөр

• 11207 км
• 82
• 15
• 3
• 2
• 2

У.Одбаяр

• 12057 км
• 79
• 5
• 3
• 2
• 6

П.Золзаяа

• 12447 км
• 114
• 21
• 4
• 1
• 1

Бахархлын тэмдгийн болзол биелүүлсэн гишүүд

Тус аяллын үеэр дараах нэр бүхий гишүүд бахархлын тэмдгийн болзол биелүүлжээ.