Улаанбаатар уулын дугуйн клубийн аялал

Аяллын талаарх нэмэлт мэдээлэл

Клубийн аяллын үечлэлийн дагуу энэ нь 2023 оны намрын өдрийн аяллын улирлын хаалтын аялал болно. Ийнхүү гишүүдийн "заавал" оролцох өдрийн аяллууд XI сараас II сарыг дуустал завсарлах ба энэ хугацаанд гэнэтийн жийлт, хоногийн аялал мөн түүнчлэн уламжлал болсон Сэлэнгэ өвлийн аялал зохиогдоно. Өдрийн аялал бол унадаг дугуйн аялал сонирхогч өргөн олон нийтэд зориулан манай клубээс зохион явуулдаг аяллуудын үндсэн төрөл юм. Өдрийн аялал нь дээр дурдсанчлан клубийн бүх гишүүдийн заавал оролцох аялал гэж тооцогддог тул энэхүү аяллын оролцоогоор "идэвхийн оноо" гэсэн статистикийн утгыг олдог. Идэвхийн оноо жагсаалтын нэгдүгээр байрыг бахархлын тэмдэгтэй эсэхээс үл шалтгаалан клубийн аль ч гишүүн эзэлж, уг жагсаалтыг тэргүүлэх боломжтой.

Өдрийн аялал 2024 оны III сарын 2-ны бямба гарагаас эхлэн үргэлжлэн зохиогдох ба түүнээс наана зохиогдох жийлт, хоногийн аялал зэрэгт идэвхтэй оролцохыг урьж байна. Өдрийн аяллын завсарлага буюу XI сараас II сарыг дуусталх хугацаанд зарлах жийлт төрлийн аяллыг тухайн долоо хоногийн бямба гарагийн цаг агаар ямар байхаас хамаарч ерөнхийдөө гэнэт гэнэт зарлах тул клубийн энэхүү веб сайтыг нээн аялал зарласан эсэхийг шалгаж байхыг сануулъя. Түүнчлэн говийг зорьсон хоногийн аялал бас уламжлалт Сэлэнгэ өвлийн аялал зохиогдохыг ч мөн сануулъя.

УБ уулын дугуйн клубийн нийт гишүүд болон унадаг дугуйн аялал сонирхогч өргөн олон нийтийг клубийн 2023 оны намрын өдрийн аяллуудын хамгийн сүүлчийнх нь болох энэхүү аялалд оролцохыг урьж байна. Энэхүү аяллын маршрут нь уулын модод дундуурх замаар явсаар УБ хотын нутаг дэвсгэрээс гардаг дөт зам гэдгээрээ онцлогтой бөгөөд энэ нь унадаг дугуйн аялалд анх удаа оролцогчид болон удаан хугацаагаар жийгээгүй гишүүд аялахад нэн зохимжтой чиглэл юм.

Аяллын тэмдэглэл

Намрын шар наран мандсан цэлмэг, час хийсэн өглөө боллоо. Цуглах цэг рүүгээ яаранхан 17 км орчим зам туулаад иртэл, 24 цагаар ажилладаг GS25 дэлгүүр тас хаалттай байв. Жигжидийн уулзварт бөөгнөрсөн дэлгүүр, цайны газрууд "найдвартай" бус улирлын чанартай "түр зуурын найдваргүй нөхөд" мэт байдгийг мэдэх тул гайхсангүй. Манай багынхан цуглан 9.00 цагт аяллын гараа эхлэв. Хоёр эгнээ болон жийсээр Хэрэмхэн дэлгүүр дээр татаж дасгал хийгээд, Сэлбийн эх рүү жийлээ. Манай баг 25 (4 бүсгүй) хүнтэй байлаа. Өнөөдрийн аяллын зай харьцангуй ойр, цаг агаар тун ч налгар байсан тул аяллын зураг (ер нь ойрын аяллуудад ийм боломж гарч байсангүй)-аа тавтайхан авахуулж манай баг жарганхан жийж явлаа.

Ноднингийн зун, намаржин энэ орчинд хийгдсэн газар шорооны ажлын үр дүн далангаар хашигдсан хиймэл цөөрмийн мөсөн бүрхүүл гялалзан биднийг угтлаа. Амралт зугаалгын бас нэгэн бүс ийнхүү үүсэж буй нь тун сайн хэрэг шүү. Одоогоор явган болон унадаг дугуйн тохижилтын ажил нь дуусаагүй харагдана. Багаараа дурсгалын зургаа авахуулан хөдөллөө. Онгичсон шороон овоолго бүхий зурвас газраар өгсөн алхаж дээд зам хүрлээ.

Уулын бэл ороон жийсээр Духын даваа руу салдаг зам дээр иртэл газрын хөрс чийгээр ханан нимгэн мөсөн бүрхүүлтэй байв. Бүгд унадаг дугуйгаар түрсээр хүслэнт хуш модны доор ирээд татав. Үдийн наранд энэ хэсэг шавран балчиг болох нь ойлгомжтой тул буцахдаа уулын хяр дамжсан замаар явахаар шийдэж явлаа.

Бид Харгана дээр 11.30 цаг гээд хүрээд ирлээ. Тавтайхан үдийн хоол хийж идэн амраад буцах замдаа оров. Буцахдаа уулын хярын замаар жийсээр Мухарын даваа дээр ирэв. Уруудан, бага шиг шавартай замаар явсаар цөөрмийн далан дээр ирж багаараа зургаа авахуулав. Анхны аяллаа хийсэн 4 шинэ гишүүн, аяллын давтагдашгүй агшинг түүх болгон үлдээсэн УТГ анд Ч.Мажигсүрэн болон багийн нийт анд нартаа халуун талархал илэрхийлье. Энэ жилийн өвлийн хаалтын аялал ийнхүү амжилттай болж дууслаа. Хэрэмхэн дэлгүүрийн талбайгаас бие биедээ амжилт хүсэн, өвлийн амралтаа сайхан эдлээрэй гэсэн ерөөлийн үгээр үдэлцэн, хотын зүг салхи татуулан жийн одох дүр зураг энэ аяллын түүхэн агшин болж сэтгэлд үлдлээ.

ВИДЕО БИЧЛЭГ

ЗУРГИЙН ЦОМОГ

Оролцсон гишүүд

• бахархлын тэмдэг
• туулсан замын урт
• оролцсон аяллын тоо
• оролцсон хоногийн аяллын тоо
• оролцсон олон хоногийн аяллын тоо
• УБ 240/24 марафоныг дуусгасан тоо
• Долоон давааны сорилго давсан тоо