Өдрийн аялал #17 - ХОЁР ДАВАА

Мэдрэмж, хандлага

Надад өөр мэдрэмж, хандлага төрүүлж болно.

Сорилт

Намайг бие болон сэтгэлийн сорилт хүлээнэ.

Тэсвэр, тэвчээр

Би замд дураараа амрахгүй, зогсохгүй.

Эрсдэл

Надад ямар ч эрсдэл учирч болно.

Хувийн шийдвэр

Оролцох шийдвэрийг би өөрөө л гаргасан.

Хариуцлага

Би өөрийгөө хамгаалж, хооллож, тээвэрлэнэ.

Байдаг л үйл

Нэр хүнд олох, бусадтай өрсөлдөх талбар биш.

Жийлтийн эрчим

Бусдын сайн, муу жийх нь надад хүртээлгүй.

Тэгш байдал

Нас, ажил мэргэжил, алдар цуу хамаагүй.

Хамжаарга

Өөрийнхөө тухай ярих нь сонин бус.

Хувийн нууц

Бусдын тухай мэдэх шаардлагагүй.

Дэг журам

Клубийн дүрмийг ёсчлон дагана.

Аяллын тэмдэглэл

Гацуурт суурин өнгөрч хар хошуу ороон Их Хуандий амны адагт гишүүд автомашинуудаа орхиод аялалдаа гарлаа. Агаарын хэм -15 орчим хүйтэн, тэгээд ч салхи өөдөөс байв. Араас нэг гишүүн шинэ хүн дагуулаад бидний араас гарсан мэдээ авлаа. Тиймээс аядуу аясаар нь эргүүлж явлаа. Хөл нь даарч байна уу гэж асуутал, манайхан гайгүй гэнэ. Гайгүй гэдэг нь даарч байгаа гэсэн үг тул дугуйнаасаа буугаад хамтдаа алхацгаая, миний хөл даарч байна гээд буулаа.

Энэ аялалд "Хайрхан аялагч клуб"-ын уулчин залуу Гантулга (хүмүүс Жэрри гэдэг) дүү оролцсон юм. Унадаг дугуй жийхэд шал өөр шинэ булчингууд ажилладаг юм байна, алхах, авирахаас огт өөр юм байна гээд, алхахыг ч харин чадна шүү гэж инээмсэглэн хэлээд хамтдаа 300 орчим метр алхлаа. Хөл ч бүлээцээд эхлэв. Давааны дор байдаг сууринд дөхөж байтал арын хоёр маань хүрээд ирлээ. Давааны зам цас ихтэй байж билээ.

Даваан дээр гараад амарч хоол идээд, Дэндийн ам руу уруудлаа. Цас бүхий уруу зам руу гурван "соёолон" дөрөөн дээрээ босож, савж жийгээд бараа тасарлаа. Араас нь болгоомжтой уруудаж байхдаа мөрийг нь харлаа, тэр чигээрээ зам хөндөлдөөд, шарваад мурилзаад явжээ. Унаж, ойчсон мөр алга. Ийм л чадвартай хүүхдүүд дээ. Амны дунд хэсэгт биднийг хүлээж байна, цаашаа явах зам эргэлзээтэй шүү гэж хэлээд дагуулаад явлаа. Нэг дугуй хагарав, дахиад нэг хагарав. Хүлээж зогсоход зарим гишүүд жиндэж байлаа.

Доор очоод нэг хүүтэйгээ хамт явж байхдаа, та нар яаж ингэж аймшиггүй урууддаг байнаа, тэнцвэрээ яаж олоод тоормосоо яаж атгаад байна гэж асуулаа. Тэгтэл харин, ийм халтиргаа, гулгаа бүхий цастай замд зөвхөн урд тоормосоо атгаж тавьж тэнцвэрээ олдог юм, хойд тоормосыг мартах хэрэгтэй гэж зөвлөлөө. Ингэж залуу гишүүнээсээ маш үнэтэй зөвлөгөө авч, цаашид яг энэ зарчмыг баримтлан жийдэг болсон. Үнэхээр сурмаар техник байсан шүү. Нар нэлээд унаж 16.00 цаг өнгөрчихлөө, зогсолтгүй жийсээр автомашин дээрээ бүрэнхийд ирж, энэ аялал амжилттай дууссан юм.