Улаанбаатар уулын дугуйн клубийн аялал

Маршрутын талаарх нэмэлт мэдээлэл

Намрын ойн жимээр Богд уул даван алхалт (8-10 км), жийлт хослуулан аялана. Аялагч нар Зайсангийн аманд цуглан Дугуй цагаан хүртэл өгсөнө. Хяр дээр гарч Зүүн ширээтийн урдуур ороон Манзуширын хийд рүү зорих ойн жимээр явсаар Түргэний голын эх рүү орж автомашины шороон замаар уруудан, Өвөр Зайсангийн амыг хөндлөн гарч даваа даван Жаргалантийн амын эх рүү орж Чингисийн хүрээний хажуугаар гаран Алдар толгой ороон Нисэх хүрч аялал дуусна. Аяллын зай 50 км.

Аяллын тэмдэглэл

Цэлмэг өглөө, намрын наран байшин барилга, моддын цаагуур нэг орж дахин гарч ирэн нуугдан тоглосон таатай орчинд цуглах цэг рүү жийж явлаа. Манай багынхан цуглаж 9.00 цагт аялал эхлэв. Явган алхаж буй хүмүүсийн хажуугаар гаран, зөрөлцсөөр тодхон замаар өгсөн Зайсангийн амын адаг рүү орлоо.

Уулын ар тал тул урьд орсон цас хайлж амжилгүй шөнөдөө мөстөж явах замыг бүрхсэн байв. Голын халиа ч бас хэргээ гарган чулуурхаг зам дээр овойно. Унадаг дугуйгаа түрж багын гишүүд шууд өгслөө. Эхний залуус 40 орчим минут зарцуулаад Дугуй цагаан дээр гарлаа. Саравчинд сууж кофе чанах хооронд баг бүрэн бүрэлдхүүнтэй боллоо.

Зүүн ширээтийг өвөрлөн Манзуширийн хийд чиглэх жимээр ортол автомашины мөр үзэгдээд эхлэв. Сүүлдээ бүр тодроод ахиулан харвал модон дунд Приус автомашин, майхан, гялгар уутан урц үзэгдэнэ. Тэнд энд тэнгэр бүдэг дуугарах чимээ гарч байсан нь самарын модыг түнших түншүүрийн дуу байжээ. Хэдэн зуун метр яваад л дээрхитэй адил отог дээр дооргүй үзэгдэнэ. Бүр замын хажууд түншүүрээ хажуудаа тавиад, тамхи татан суух хүмүүстэй ч таарав.

Богд уулын Жаргалантын амаар автомашинтай хүмүүс өгсөн Дугуй цагаан дээр гараад энэ жим рүү орон явсаар Зүүн Ширээтийн зүүн урд тал хүртэл тод зам бий болгожээ. Учир нь бид энэ замыг даган явсаар нэлээд дээш өгсөн, зорьсон жимээсээ хазайж, буух энгэрийнхээ хойд талын амны эх руу шургасан байлаа.

Хазайсан чиглэлээ засан уруудах амны хойд хярын наран туссан энгэрт татаж, өдрийн хоол цайгаа хийж идлээ. Шар тэмдгийн болзол хангасан гишүүнд тэмдгийг нь гардуулав.

Доош уруудан замтай нийлэн Түргэний гол даган жийхэд, модны зах бараадуулан 10-аад жижиг автомашинуудыг жирийтэл байрлуулсан харагдана. Бүгд улсын дугаараа авсан байхыг манай багын нэг гишүүн гярхай ажигласан байв. Сайхан шороон замаар уруудан, салхи сөрөн доошлоход нэг том хашаа зам хөндлөн барьсан байлаа. Дотор нь байшин барилга барьж буй бололтой хэрзийсэн төмөр бетон байгууламж харагдана. Одоогоор дундуур нь гарч болох ч ирээдүйд энэ чиглэл "байхгүй" болохыг тааж харамслаа. Өвөр Зайсангийн амыг хөндлөн гарч Жаргалантын ам руу орох даваа өөд махийтал жийлээ. Багын 5 залуу бахдалтай нь аргагүй жийсээр байгаад даваа дээр гарав.

Овоо хүчтэй салхи сөрөн энгэрээр нь шинэ хотхон, байшин барилга ярайсан Жаргалантын ам руу уруудан Чингисийн хүрээний хажуугаар гаран

Нисэх хүртэл яваад CU дэлгүүр орж халуун цай кофе уун хууч хөөрөөд, гэр гэрийн зүг жавхаатай жийн одсоноор энэ удаагийн аялал амжилттай дууслаа. Зүгээр л жий.

Жич: Манайхан удахгүй холбогдох фото зураг, бичлэг оруулан энэ тэмдэглэлээ "гоёх" байх.

Оролцсон гишүүд

• бахархлын тэмдэг
• туулсан замын урт
• оролцсон аяллын тоо
• оролцсон хоногийн аяллын тоо
• оролцсон олон хоногийн аяллын тоо
• УБ 240/24 марафоныг дуусгасан тоо
• Долоон давааны сорилго давсан тоо