Өдрийн аялал #128 - Харгана буюу өвлийн анхны цасны өмнөх өдөр

Аяллын тэмдэглэл

Группийн намрын нэгэн жирийн аялал Жигжидийн уулзвараас эхлэн, багаараа хоёрын цуваагаар салхи сөрөн Хуурай мухарын зуслангийн ам өнгөрч явлаа. Хотоос ирж биднийг гарган өгч, магнайд салхи хагалан жийж явсан анд маань эндээс буцлаа...

... Баруун хойд, хойд зүгээс салхилсан, хойд зүгийн уулсын орой мананд "идэгдсэн" бүрхэг өглөө боллоо. Ийм эрт дугуйтай жийхэд чих даарахгүй байгаа нь дулаан өдөр байгааг илтгэнэ. Салхи сөрөн Дарь эх, Дамбадаржаа өнгөрөн Шадивлангийн зуслангийн төв замтай нийлэхүйд бие тавигдаж, халуун хөлс урсан аялал эхлэх цэг хүртэл Зуунмод, Яргайт, Гоодой, Богинын ам, Жигжидийн зуслан бий шүү дээ гэж дараалалаар нь бодохуйд бие хөнгөрөн ухасхийж билээ. Нэг гишүүн ирчихсэн байлаа. Ар араасаа 5-10 минутын давтамжтайгаар гишүүд ирсээр 9.04 цагт аялал эхлэв.

Доод Шарга морьт, Хуурай Мухар, Баянбулаг, Майхан толгой, Хандгайт, Санзай, Бага Баянгийн ам өнгөрөн Сэлбэ голын эх рүү хүрлээ. Шороо ачсан том том ачааны тэргүүд цувж байлаа. Хаврын эхэн сард биднийг явахад томоохон хэмжээний тошин үүссэн байдаг газрын хөрсийг хуулж, "бүтээн байгуулалт" -ын ажил ид дундаа өрнөж байлаа.

Зураг 1. Ийм дүр төрх харагдаж байсан. Магадгүй тун тохилог ирээдүйг байгуулж байж ч болно.

Голын эх булаг болдог бяцхан горхийг голдрилын дагуу хөрсийг нь 80 см орчим гүнтэй ухаж, торлогыг нь эргүүлэн захаар нь овоолсон байв. Алсын чигийг нь харвал Мухарын даваа чиглэх зүгт хэд хэдэн экскаватор торлог дундуур харагдаж байсан. Ирээдүйд энэ газар амралт зугаалгын бүс байгуулах гэж буй бололтой гэж бид таамаглав.

Харгана зорих зам маань хэвээрээ байна.

Зураг 2. Торлогууд зүүрмэглэсэн мэт намуухан орчинд аялагч нар тайвуухан урагшилна

Дов сондуул, зам даган урсах ус, шаварны зай завсраар шалчигнуулан жийсээр Духын давааны замаас салан уулын бэл дээрхи том модны харалдаа татлаа.

Зураг 4. Хоёрын зэрэг горхины голдрил дайран гардаг тул шавар ус тааралддаг

Зураг 5. Зарим газар дов сондуул түүнийг дагасан ус шавар бүхий газраар явна

Зураг 6. Харгана хүрэх замын ихэнх хэсэг жирийтэл жийх боломжтой байдаг

Намрын ойн дундуур шаргалтан зурайх замаар жийсээр Харгана дээр 10.55 цагт очиж үдлэв.

Түүдэг асаан хоол цайгаа хийн тулга дээр хийж идэн тавтай амарсан даа.

Идээ, будаа, цай ундааны элбэгийг яана...

Асаасан түүдгээ "нам" унтраагаад ирсэн замаараа жийсээр Жигжид дээр 13.30 цагт ирэв. Богинын аманд байшин барьж буй гишүүн бүсгүй биднийг урьсан тул тавуулаа очиж, амтат хоол, цайгаар дайлуулан хэзээ ч дуусашгүй аяллын яриагаар хөгжилдөн ярилцаж, хотын зүг салхиндаа туугдан орж гэртээ ирвээс цаг 15.30 болж байлаа.

Зураг 10. Дараа дахин уулзья, Харгана минь

Ийнхүү салхитай, манантай, түүдэгтэй, урилгатай, намартай аялал амжилттай болж дууссан билээ. Аяллын явцын фото зургийг авч аялсан ШТГ Б.Жавхлантөгс анддаа талархал дэвшүүлье.

Төгсгөлийн оронд

Аяллын тэмдэглэлийн төгсгөл болгон өөр хэдэн фото зураг оруулсуу. ШТГ Б.Жавхлантөгс анд маань камерын шагайвчны ард "жийсээр" фото зургуудад бараг буугаагүй ажээ.

Зураг 11. Бидний өрдсөн түүдэг гал болон багийн гишүүдийн аяны гал тогоонуудын нэг

Энэ бол өвлийн анхны цасны яг өмнөх өдрийн буюу намар цагийн төгсгөлд болсон аялал байлаа. Аяллын маргааш өглөө сэрээд харахад хамаг бүхэн цасанд дарагдсан нь "өчигдөр намар - өнөөдөр өвөл" гэсэн бодлыг өөрийн эрхгүй төрүүлж байв.